WAZABUNI WABABAISHAJI KUNYIMWA KAZI-GEITA DC

Posted on: January 21st, 2025

Makamu Mwenyekiti Halmashauri ya Wilaya ya Geita Mhe Hadija Said, Januari 20 ameongoza wajumbe wa Kamati ya Fedha na Uongozi Halmashauri ya Wilaya ya Geita kukagua miradi ya Maendeleo jimbo la Geita. 

Mhe Hadija  ambaye pia ni Diwani wa Kata ya Nyamigota ametoa  pongezi kwa Watumishi wa Halmashauri kwa namna ambavyo  wanasimamia miradi  inayotekelezwa na Serikali.

Pamoja na pongezi hizo Makamu Mwenyekiti huyo amewataka  mafundi wanaotekeleza miradi hiyo kuweka bidii ili miradi ikamilike kwa wakati na kuanza kutoa huduma.

" Jitihada ziongezeke na iwapo kuna mkwamo  wowote basi mtoe taarifa kwa Mkurugenzi Mtendaji ili hatua za haraka zichukuliwe" amesisitiza Mhe Hadija katika ziara hiyo.

Kwa upande  wake Diwani wa Kata ya Lwezera Mhe Chinchina amewataka  wahandisi kuzingatia  kuweka mifumo ya kuvuna maji  kwenye shule  ili  yaweze kusaidia katika matumizi mbalimbali. 

" Tunapokuwa na Mifumo ya kuvuna maji  itasaidia  uwepo  wa maji ya kutosha na kusaidia kuzuia magonjwa ya milipuko" Amesema Mhe Chinchina. 

Aidha wajumbe wa Kamati ya Fedha na Uongozi wamempongeza Diwani wa Kata ya Kakubilo Mhe Kessy kwa kutoa  eneo lake kwa ajili ya ujenzi wa Shule ya Msingi  Ikigijo. 

Vilevile Kamati hiyo imewaagiza mafundi kuongeza nguvu kazi ya kutosha ili kuweza Kukamilisha miradi ndani ya muda kwa ubora  unaotakiwa.

Pamoja na kuwasisitiza mafundi ujenzi kuongeza nguvu kazi,  Kamati hiyo imetoa  wito  kwa Watumishi wanaosimamia wazabuni  wanaomba kazi za miradi  kupitia mfumo wa Nest kuepuka kuwapa kazi wazabuni wanaochukua kazi nyingi ilihali hawana uwezo wa kuzitekeleza kwa wakati na kusababisha kuchelewa kukamilika kwa miradi

Kamati ya Fedha na Uongozi ikiwa katika Ujenzi wa Nyumba ya Mtumishi  Shule ya Sekondari Nyakaduha. Mradi huu una Thamani ya Shilingi Milioni 100,000,000 kutoka Serikali Kuu.

Kamati ya Fedha na Uongozi ikiwa katika Mradi wa Ujenzi wa Shule ya Amali Nzera wenye thamani ya Shilingi Milioni 584,280,029

Kamati ya Fedha na Uongozi ikiwa katika Mradi wa Ukamilishaji wa Bweni Shule ya Sekondari Kakubilo  wenye thamani ya Shilingi Milioni 60,000,000 kutoka Serikali Kuu. Kamati hiyo imewataka wanafunzi wanaotumia Bweni hilo kulitunza