UZINDUZI WA KAMPENI YA MSAADA WA KISHERIA GEITA WANANCHI WAASWA KUJITOKEZA KWA WINGI

Posted on: January 26th, 2025

Uzinduzi wa  Kampeni  ya Kitaifa ya Msaada wa Kisheria ya Mama Samia umefanyika leo Januari 26,2025 Mkoani Geita.

Akimuwakilisha Naibu Waziri Mkuu na Waziri wa Nishati Mhe Dotto Mashaka Biteko( MB), Mkuu wa Mkoa wa Geita Mhe Martine Shigela amezindua Kampeni hiyo  ambayo Wizara ya Katiba na Sheria  imekasimiwa kuratibu Kampeni hiyo.

Uzinduzi huo umefanyika katika viwanja vya Kalangalala ambapo   Taasisi mbalimbali zimehudhuria ambazo ni wakala  wa usajili ufilisi na udhamini(RITA), Tanganyika Law Society (TLS) na  Shirika la NELICO.

Mhe Shigela amesema Serikali ya awamu ya sita inayo ongozwa na Mhe Dkt Samia Suluhu Hassan inatambua wananchi wengi wanakosa msaada wa kisheria kwa kuwa gharama za kulipa Mawakili ni kubwa.

"Mhe  Dkt Samia Suluhu Hassan ameona  wapo watanzania ambao hawana uwezo wa kulipa Mawakili ili kupata huduma za kisheria  hivyo  Serikali inayofedha ya kuwalipa Mawakili ili wananchi wanufaike na huduma ya msaada wa kisheria" Amesema Mhe Shigela.

Aidha Mhe Shigela amesema Kampeni hiyo inaongeza wigo wa kupata elimu  na kupata huduma za kisheria ikiwa ni pamoja na kupanua utawala bora  na demokrasi na kupunguza matatizo ambayo yanahitaji msaada wa kisheria Bila kujali umri na uwezo wa wananchi.

"Tuendelee kujipanga na kuhamasisha wananchi kujitokeza kwa wingi ili  mambo yanayowakabili wananchi hasa kwenye madini, ardhi, Mirathi , ndoa,  ukatili wa kijinsia na watoto yaweze kupatiwa ufumbuzi na yale mambo yatakayobainika na kupelekwa mahakamani basi wananchi wajitokeze kwenda kutoa ushahidi. " Ameongeza Mhe Shigela.

"Mjitokeze kutoa ushahidi kwani Mhe Dkt Samia Suluhu Hassan anazo fedha za kuwalipa mawakili  wote wanaosimamia hizo kesi. Tujipange kuhakikisha kila mwananchi anapata huduma" Amesisitiza Mhe Shigela.

Pamoja na hayo Mhe Martine Shigela ametoa  wito kwa wananchi waliohudhuria uzinduzi huo kuwa Mabalozi kwa wengine ili waweze kujitokeza kupata huduma hiyo. Vilevile Mhe Shigela amezitaka Taasisi mbalimbali,  vyama vya siasa, Taasisi za Kidini Pamoja na vyombo vya habari kuendelea kutoa taarifa na kuhamasisha wananchi ili kujitokeza  katika kampeni hiyo.

"Niwasihi kujipanga kuhamasisha wananchi,  Viongozi wa Dini hii iwe sehemu ya Ibada kwani  wananchi wanapopata huduma mnapata thawabu" Ameongeza Mhe Shigela.

Akihitimisha hotuba yake Mkuu wa Mkoa wa Geita amesema dhamira ya Mhe Dkt Samia Suluhu Hassan ni kuwahudumia Watanzania na ameendelea kuwa na ubunifu kila wakati  kuigusa mioyo  ya watu waliopoteza haki zao na kutoa wito kwa Mawakili wanaosimamia mashauri ya wananchi kuyapeleka mahakamani yale yanayotakiwa huku akiwasihi wananchi kujitokeza kutoa ushahidi wanapohitajika.

Mkoa wa Geita una jumla ya Halmashauri Sita ambazo kila Halmashauri inatarajiwa kufikiwa kwa idadi ya kata 10.