TIMU YA MENEJIMENTI HALMASHAURI YA WILAYA YA GEITA YASHIRIKI MAFUNZO YA E-BOARD TOLEO LA PILI

Posted on: November 30th, 2025

Dodoma-Tanzania

Timu ya Menejimenti ya Halmashauri ya Wilaya ya Geita imeshiriki kikao cha mafunzo ya mfumo wa e-Board toleo la pili, yakiongozwa na Kaimu Mkurugenzi wa Halmashauri, Dkt. Alphonce Bagambabyaki.

Mafunzo hayo ya siku mbili yanafanyika katika Ukumbi wa East Africa, Ndaki ya Informatics, Chuo Kikuu cha Dodoma (UDOM), yakiwa na lengo la kuboresha ufanisi katika uongozi na usimamizi wa vikao ndani ya taasisi za umma.

Mafunzo yamefunguliwa na Raphael Rutaihwa, Meneja wa Huduma za Sheria katika Mamlaka ya Serikali Mtandao (e-GA).

Akizungumza wakati wa ufunguzi, Rutaihwa amesema Serikali inalenga kubadili mfumo wa matumizi ya karatasi na kuelekea kwenye mifumo ya kidijitali ili kuongeza ufanisi, kupunguza gharama za uendeshaji na kulinda mazingira. Amesema mfumo wa e-Board ulioandaliwa na e-GA, unarahisisha uratibu wa vikao vya bodi, kamati, menejimenti na halmashauri kwa njia salama na ya kisasa.

Ameeleza kuwa matumizi ya karatasi yamekuwa yakisababisha gharama kubwa za manunuzi, uharibifu wa mazingira kutokana na ukataji wa miti, pamoja na uchafuzi unaotokana na uchomaji wa makaratasi.

Aidha, Rutaihwa amesema matumizi ya mfumo wa e-Board yanarahisisha utoaji wa maamuzi, yanapunguza athari za kiafya kwa watumiaji wa mashine za kuchapisha (printers), na kurahisisha usambazaji wa taarifa kwa wanachama wa vikao bila kuchelewa.