BARAZA LA MADIWANI LAAGIZA WATENDAJI WA VIJIJI WALIOKULA HELA ZA WANANCHI KUZIREJESHA KABLA YA KUKABIDHI OFISI-GEITA DC

Posted on: November 16th, 2023

Na: Hendrick Msangi

Mkutano wa Baraza la Madiwani la Halmashauri ya Wilaya ya Geita uliofanyika Novemba 15, na 16, 2023  umeutaka Uongozi wa Halmashauri hiyo kuwarudisha kwenye vituo vyao vya kazi Watendaji wa vijiji ambao walihamishwa kwa taratatibu za kiutumishi kwenye vituo vyao vya awali ili wakabidhi ofisi  ikiwa ni pamoja na kulipa madeni ambayo wanadaiwa na wananchi wa vijiji hivyo.

Akizungumza kwenye baraza la Madiwani Mwenyekiti wa Halmashauri ya Wilaya ya Geita, Mhe Charles Kazungu amemtaka Mkurugenzi wa Halmashauri hiyo kuchukua hatua za kiutumishi kwa kuwaandikia barua watendaji hao ambao wameoyesha kukiuka maadili ya kiutumishi na kuwataka warudishe fedha za wananchi walizochangisha kwa ajili ya miradi katika vijiji vyao.

Mwenyekiti wa Halmashauri ya Wilaya ya Geita Mhe Charles Kazungu akiwa na Kaimu Mkurugenzi wa Halmashauri hiyo kwenye kikao cha Baraza la Madiwani

“Niendelee kusisitiza ofisi ya Mkuregenzi kuwaandikia barua Watendaji hao waende kumalizana na wananchi na wasipofanya hivyo kanuni na taratibu za kiutumishi zitumike juu yao tunahitaji watumishi waadilifu” alisema Mhe Kazungu.

Naye Mkuu wa Wilaya ya Geita Mhe. Cornel Maghembe katika baraza hilo ameelekeza uongozi wa Halmashauri unapofanya mabadiliko kuhakikisha watumishi wanaotoka sehemu moja kwenda sehemu nyingine wanafanya makabidhiano ya kiofisi na kuhakikisha wanamalizana na wananchi. “Mtakumbuka mwenyekiti wa CCM Mkoa alizungumzia vijiji viwili kwenye kata ya Nkome ambayo kuna mtendaji amehamishiwa kwenda kijiji kingine na inasemekana ameondoka na milioni 10 za wananchi “alisema Maghembe

Aidha aliwataka watendaji ambao wamehamishwa wakaripoti kwenye ofisi walizopangiwa na badaye warudi kwenye vijiji vyao kumalizana na wananchi.

Pamoja na hayo Mheshiwa  Faraji Seif amabaye ni Diwani wa kata ya Bukoli ambao watendaji wa vijiji hivyo vya Ntono na Ikina wanakotoka amesema anakiri kuwepo kwa madeni hayo kutoka kwa wananchi ambao amesema iwapo zitafanyiwa uchunguzi zitakuwa ni zaidi ya hizo ambazo wananchi wanalalamika kuchangishwa  na hazikupelekwa benki au kufanya kazi iliyokusudiwa.

Kwa upande wa uongozi wa Halmashauri ya wilaya ya Geita umesema umeliopokea jambo hilo na litafanyiwa kazi kwa uharaka kwa kuchukua hatua stahiki.