GEITA DC YAPOKEA ZANA ZA KILIMO KUTOKA WIZARA YA KILIMO

Posted on: December 1st, 2025

Nzera-Geita

Wizara ya Kilimo imetoa zana za Kilimo ambazo ni  Matrekta 5 na Pawatila 16 pamoja na viambata vyake.

Akipokea hati ya makabidhiano ya vifaa hivyo kutoka kwa Afisa Manunuzi Wizara ya Kilimo Ndg Stephen Ikanga, Desemba Mosi, 2025 Kaimu Mkurugenzi Mtendaji Halmashauri ya Wilaya ya Geita Dkt Alphonce Bagambabyaki ameishukuru Serikali kupitia Wizara ya Kilimo kwa kutoa zana hizo kuwasaidia wakulima katika Halmashauri ya Wilaya ya Geita.

" Tunashukuru Serikali inayo ongozwa na Mhe Dkt Samia Suluhu Hassan kwa kutupatia zana hizi kwani Uhitaji ni mkubwa sana kwani shughuli za Kilimo hususani zao la Mpunga  zinafanyika kwa kiasi kikubwa katika maeneo yetu" Amesema Dkt Alphonce.

Vile Vile Dkt Alphonce amesema zana hizo zitawasaidia wakulima wakubwa na wadogo na kwa kuzingatia jiografia ya Maeneo ya Halmashauri ya Wilaya ya Geita Pawatila zitatumika  kwa maeneo ambayo Trekta hazitaweza kufika na kwa wakulima ambao hulima ekari chache.

Pamoja na hayo Kaimu Mkurugenzi amemshukuru  Mbunge wa Jimbo la Geita Mhe Joseph Kasheku Musukuma kwa juhudi zake katika upatikanaji wa zana hizo ambazo zitaenda kuongeza uzalishaji ndani ya Halmashauri na  kukuza uchumi wa wananchi.

Lengo  la kutoa zana hizo ni kuanzishwa kwa kituo cha Zana za Kilimo Katika Halmashauri ya Wilaya ya Geita ambapo wakulima  wataweza kukodi zana hizo kwa gharama ndogo ili kufanikisha shughuli za kilimo katika maeneo yao.